ෂෙරටන් වෙළඳ නාමය යටතේ හෝටලයක් ඉදිකිරීමට ගාලු මුවදොර අසලින් අක්කර පහක ඉඩමක් දිගුකාලීන බද්දට ඉන්දීය ITC සමාගමට ලබාදීමේ ගනුදෙනුව මැයි 10 වනවිට අවසන් කිරීමට සැලසුම් කර ඇතැයි මහා භාණ්ඩාගාර ලේකම්වරයා කියයි.

යෝජිත නුවර කොළඹ අධිවේගී මාර්ගය ඉදිකිරීමේදී කුරුණෑගල සිට යාපනය දක්වාත් දඹුල්ලේ සිට ත්‍රිකුණාමලය දක්වාත් අධිවේගී මාර්ග පද්ධතියක් ඉදිකිරීමට රජයේ අවධානය යොමුවේ.

නුවරඑළියේ කිරි ගොවීන් කිරි මහමග හලා දැමීම පසුපස දේශපාලන කුමන්ත්‍රණයක් ඇතැයි චෝදනා කරන රජය එම ප්‍රදේශවල සියළුම දියර කිරි මිල්කෝ ආයතනය මගින් මිලදීගෙන කිරිපිටි නිෂ්පාදනය කිරීමට තීරණය කර ඇතැයි කියයි.

ශ්‍රී ලංකා මහ බැංකුවෙන් විශ්‍රාම ගිය නියෝජ්‍ය අධිපතිවරයෙකු ලංකා ඔරික්ස් ලීසිං සමාගම් සමූහයට අනුබද්ධ මූල්‍ය සමාගමක අධ්‍යක්ෂ තනතුරක් භාරගනී.

ජාත්‍යන්තර මූල්‍ය අරමුදල සමග පවතින ණය වැඩසටහන 2012 ජූලි මාසයේදී අවසන් වුවත් ආයෝජකයින්ගේ විශ්වාසය තහවුරු කරමින් මූල්‍ය අරමුදල සමග තවත් වැඩසටහනක් ක්‍රියාත්මක කිරීමට ලංකාව සාකච්ඡා කරමින් සිටින බව මහ බැංකු අධිපතිවරයා කියයි.