මැයි,19 (විමසුම) - ශ්‍රී ලංකාව හා පාකිස්ථානය අතර අබුඩාබිහි දී පැවැත්වුණු පළමු එක් දින තරඟයෙන් කඩුලු 5ක ජයක් ලැබීමට පාකිස්ථානු කණ්ඩායම පසුගියදා සමත් විය.ෂෙයික් සෙයිඩ් ක්‍රීඩාංගනයේ දී පැවැත්වුණු මෙම තරඟයේ දී තරඟයේ වීරයා බවට පත් වූයේ පාකිස්ථානය වෙනුවෙන් ලකුණු 73ක් ලබා ගත් ක්‍රීඩක සයිඩ් අෆ්‍රීඩිය.

මැයි,19,(විමසුම) - වොෂින්ටනයේ ශ්‍රී ලංකා තානාපතිවරයා ලෙස කටයුතු කරන බර්නාඩ් ගුණතිලක මහතා එරට ගුවන් විදුලි සේවයක් සමඟ සම්මුඛ සාකච්ඡාවකට එක් වෙමින් පසුගියදා පවසා ඇත්තේ එල්.ටී.ටී.ඊය විසින් නොර්වීජියානු විදේශ ගමන් බලපත්‍ර 130,000කට ආසන්න ප්‍රමාණයක් සොරා ගෙන ඒවා වැඩිම මිළට අල් කයිඩා ත්‍රස්තවාදී සංවිධානය ඇතුළු සංවිධානවලට සහ පුද්ගලයින්ට අළෙවි කොට ඇති බවයි.

මැයි,19,(විමසුම) - ශ්‍රී ලංකා යුධ හමුදාව විසින් අද දින උදෑසන සිට ඒ 9 මාර්ගය විවෘත කර ඇත.සාමාන්‍ය ජනතාවගේ අවශ්‍යතා සැලකිල්ලට ගනිමින් මෙසේ ඒ 9 මාර්ගය විවෘත කළ බවයි ජාතික ආරක්ෂාව පිළිබඳ මාධ්‍ය මධ්‍යස්ථානය පැවසුවේ.

මැයි,20 (විමසුම) - ඊයේ (19) සවස 5.30 ට පමණ එල්.ටී.ටී.ඊ ත්‍රස්තවාදීන් පිරිසක් යාපනය මුහමාලේ ඉදිරි ආරක්ෂක වළල්ල තුළට පැමිණීමට දැරූ උත්සාහයක් මුළුමනින්ම ව්‍යර්ථ කිරීමට ආරක්ෂක හමුදා සමත් වූ බව බව ජාතික ආරක්ෂාව පිළිබඳ මාධ්‍ය මධ්‍යස්ථානය පැවසීය.

මැයි,20,(විමසුම) - ත්‍රස්තවාදය මැඩලීමට සියලු රටවල් එක්ව කටයුතු කළ යුතු බව ජනාධිපති මහින්ද රාජපක්ෂ මැතිතුමා ‍ජී 11 සමුළුව අමතමින් ප්‍රකාශ ‍කළේය.