හම්බන්තොට වරායේ ගබඩා පහසුකම් තුනක් ගොඩනැගීමට සමාගම් තුනක් සඳහා කල්බදු පහසුකම යටතේ ඉඩම් ලබාදීමට රජයේ අවසර හිමිවූ බව අමාත්‍ය කෙහෙළිය රඹුක්වැල්ල කියයි.

මේ අනුව, අදාළ සමාගම් තුනට හම්බන්තොට වරාය තුළ ගබඩා පහසුකම් ආරම්භ කිරීමට කැබිනට් මණ්ඩලය විසින් අවසර ලබාදී ඇත.

වරාය අධිකාරිය විසින් හම්බන්තොට වරාය කාර්මික වරායන් ලෙස ප්‍රවර්ධනය කරන අතර වාහන ප්‍රති අපනයන කටයුතු වෙනුවෙන් වැඩි ප්‍රමුඛත්වයක් ලබාදී ඇත.

මෙම සමාගම් තුන සඳහා වසර 15 ක් සඳහා මෙම ඉඩම් ලබාදෙන අතර සිදුකිරීමට යන ආයෝජනය ඩොලර් මිලියන 15.5 ක් පමණ වනබව රජය කියයි.

මේ යටතේ හෙක්ටයාර් 2.5 ක ඉඩමක ගබඩා පහසුකම් ගොඩ නැගීම සඳහා McLarens Holdings Ltd සමාගම ඩොලර් මිලියන 4.0 ක්ද, හෙක්ටයාර් 2.0 ක ඉඩමක ගබඩා පහසුකම් ගොඩනැගීමට Ace Distripartks (Pvt) Ltd සමාගම ඩොලර් මිලියන 3.0 ක්ද හෙක්ටයාර් 3.0 ක ඉඩමක ගබඩා පහසුකම් ගොඩනැගීමට Agalawatte Plantaions Plc ඩොලර් මිලියන 8.5 ක්ද ආයෝජනය කිරීමට නියමිතය.